Одржувањето на јавната чистота преку селективното одложување отпад, собирањето и неговото рециклирање е од големо значење за обезбедување на здрава и чиста животна средина во општина Центар. Затоа, ЈП ПОЦ и Општина Центар го воведоа светскиот тренд во рециклирањето – повратни вендинг машини за пластични шишиња и лименки со цел да ги мотивираат граѓаните да се вклучат во овој процес и да учествуваат во правилно справување со отпадот.

Во рамките на проектот „И отпадот има вредност!“ веќе се пуштени во употреба машините за рециклирање поставени на 25 локации на територија на Општина Центар.

Преку повратните вендинг машини жителите на Општина Центар имаат можност да рециклираат PET пластични шишиња и лименки, за што добиваат субвенции од Општина Центар на нивната Green Pay платежна картичка и имаат можност да купуваат со попусти во зелената мрежа на локали кои се приклучија во овој проект – маркети, ресторани, кафеани, кафулиња, бутици, книжарници, салони за убавина и сл. До сега, оваа мрежа вклучува повеќе од 100 локали кои овозможуваат попусти, а заради големиот интерес зелената мрежа секојдневно ќе се проширува.